HAM-Farir

Við Ósk skelltum okkur á tónleika í gær, á Nordatlantens Brygge. Þar komu fram fimm hljómsveitir. Tvær frá færeyjum, ein frá grænlandi, ein dönsk, og ein íslensk.

Fyrstir á svið voru hinir færeysku Makrel. Þeir byrjuðu ágætlega, en svo fóru þeir að verða þreittir. Hljóðfæraleikurinn var fínn, en söngurinn ekki. Það fór sérstaklega í taugarnar á mér hvað söngvarinn ofnotaði hinn ofnotaða pitch-shifting effect. Tvöföld ofnotkun = ekki gott. Besti maðurinn í bandinu var samt án efa stand-in gítarleikarinn. Annar af alvöru gítarleikurum hljómsveitarinnar komst ekki vegna þess að færeyjar virðast vera mjög aftarlega á merinni hvað varðar sjálfsögð mannréttindi. Makrel náði aldrei að koma á alvöru stemningu og fengu ekki uppklapp.

Næst stigu á stokk hinir grænlesku Chilly Friday. Þeir voru bara nokkuð góðir og kunnu að halda uppi stuðinu. Fengu fólk til að hópast saman fyrir framan sviðið, hentu út lifandis helling af glowsticks og voru bara gríðarlega hressir. Það sem mér fannst helst athugavert við þá var að þeir gátu ekki ákveðið sig hvort þeir vildu spila hardcore rock eða klisjulegt sveitaballa blöðrupopp. Ég mæli með að þeir veljið hið fyrra, það er allt of mikið af hinu nú þegar.

Á meðan að Chilly Friday spiluðu, þá fékk ég loksins að upplifa það sem ég hef heyrt svo mikið af sögum af. Blindhaugafullum grænlenskum ellismelli í partýgírnum. Ég hugsa að hann hafi hellt niður að meðaltali 3 bjórum á hverjum klukkutíma, auk þess sem ég sá hann bæði (óvart) brenna stelpu með sígarettu, og (óvart) fá sjálfur sígarettu í smettið. Hann lét þettta þó ekki stöðva sig og hélt áfram að dansa einn um gólfið, yfir sig hrifinn af glowsticks-unum sínum.

En nú var röðin komin að því sem við komum að sjá. Hin goðsagnakennda íslenska ofurrokksveit Ham steig á svið. Og viti menn, þeir hafa engu gleymt. Þeir fóru alveg á kostum og þegar partýbær byrjaði þá myndaðist prýðilegur slammhringur á miðju gólfinu. Ekki var þó öllum (dönum/færeyingum) skemmt. Það eina sem ég hef út á framkomu Ham að setja, er að ég hefði alveg viljað sleppa við að sjá Óttar Proppé fara úr að ofan. En svona er nú bara rokkið.

Eftir að Ham voru búnir ákváðum við að drífa okkur út, til að ná síðustu lestinni heim. Ég bið hljómsveitirnar 200 og Whomadewho velvirðingar á því.

Skemtilegt comment

Ég rakst á mjög fyndið comment á blogginu hans Bruce Schneier. Athugið þó að þetta er svolítið inside joke, og líklegast ekkert fyndið fyrir þá sem vita ekki hver Bruce Schneier er.

Sheeesh

Það gæti reynst erfitt að finna krimmann sem líkist þessum á sketch myndinni…

Knútolf

Í gærkvöldi datt mér i hug hvað það væri sniðugt að skíra einhvern Knútolf. Algerlega brilliant nafn, þó ég segi sjálfur frá.

Target Spam

Mér þykir, líkt og öllum öðrum, ruslpóstur vera óþveri. Ég skil það samt að það séu einhverjir sálarlausir zombies þarna úti sem séu að græða á tá og fingri við að senda út spam fyrir aðra. Ég get hins vegar ekki með nokkru móti skilið þegar fólk er að senda spam með einhverjum handahófskenndum texta, án þess að vera einu sinni að reyna að selja neitt.

Ég var rétt í þessu að fá target-spam, sem namedroppar einhver Java API og Head First Design Patterns bókina. Í svona tótal nonsense spam texta. Ég skal gefa ykkur smá smakk:

…you know in between sips of a martini. format designed for the way support in your own code. challenging.

Ég veit ekki hvort að það sé tilviljun eða hvort að ég sé í einhverri target grúppu fyrir svona topic. Það sem mér þykir hins vegar óskiljanlegt er að það eru engir linkar í þessu og ekki verið að reyna að selja neitt. Þetta er einfaldlega bara svona gjörðu svo vel, hér er bull texti.

Það eina sem mér dettur í hug er ef að sölupointið sé í myndum sem eru í HTML skeytinu. GMail er svo gott að fela það allt saman fyrir mér. Það er einmitt líka hægt að nota slíkar myndir til að sjá hvort að netfang sé virkt eða ekki.

Að lokum, ef að þið mætið einhvern tíman spammara úti á götu, þá megiði endilega slá hann nokkrum sinnum utan undir með silungi.

Sannfæringarkraftur

Sumt fólk hefur alveg ótrúlegan sannfæringakraft. Það getur sannfært stóran fjölda fólks, jafnvel stóran hluta heimsins, um það sem þeim sýnist.

W notar imbarök til að sannfæra fólk um að hryðujuverkaógnin sé alls staðar og að allar aðgerðir hans og stjórnar hans séu réttlætanlegar þess vegna. Fólk sem er ósammála honum er annað hvort fylgjandi hryðujuverkum eða heilaþvegið af áróðri hryðjuverkamanna.

Steve Jobs er mjög sannfærandi maður. Hann mætir á svið í gallabuxum og rúllukragabol og sannfærir fólk um hvað nýja dótið hans sé frábært. Honum tekst meira að segja að fá einfalda hluti eins og liti til að virka sem stórkostlegasta fítus allra tíma. “Og hey, þið getið fengið þennan iMac í fimm mismunandi litum”, og áhorfendur bregðast við eins og að þeir hafi aldrei átt litabók.

En það er þó einn aðili sem að slær W, Jobs og öllum hinum við. Það er eiginlega réttara að segja að hann rústi þeim í sannfæringakrafti. Það sem meira er að þessum aðila tókst að halda nafnleynd. Ég veit a.m.k. ekki hver þetta var.

Þessi nafnleynd er samt engin tilviljun. Þessi aðili hefur nefnilega púllað einn rosalegasta hrekk allra tíma. Reyndar er þessi eld-gamli hrekkur svo vel útfærður að það er fullt af fólki sem er ekki enn búið að fatta hann. En nú, gott fólk, ætla ég að upplýsa þennan hrekk og ég vona innilega að þið látið ykkur þetta að kenningu verða.

Fyrir langa löngu var einhver mjög sannfærandi aðili sem sannfærði fjölda fólks um að túnfiskur væri matur. Ég er viss um að honum hafi fundist þetta ógeðslega fyndið fyristu vikurnar, mánuðina og jafnvel árin. Svo held ég að hann hafi bara ákveðið að fyrst að fólk væri svona auðtrúa þá mætti það bara halda áfram að éta þennan viðbjóð.

En jæja, núna vitiði sannleikann og getið hætt að veiða, vinna, selja, kaupa og éta þennan viðbjóð.

Beljari

Mikið finnst mér asnalegt að síður í heimabankanum mínum taki rosalega langan tíma að hlaðast af því að secure.teljari.is sé að skumpa í brækurnar. Ég skil reyndar ekki hvers vegna heimabankar eru að notast við utanaðkomandi teljara á annað borð. Ef þeir vilja halda utan um heimsóknir og notkun, af hverju gera þeir þá bara ekki sjálfir? Það er ekki eins og að þeir séu að selja auglýsingar inn á þetta.